டிரம்பின் வற்புறுத்தலின் பேரில் பல செயலிகளை அகற்றிய Apple நிறுவனம்

அமெரிக்காவில் குடிவரவு அதிகாரிகளின் இருப்பிடங்கள் குறித்து எச்சரிக்கும் பல பிரபலமான செயலிகளை Apple நிறுவனம் தனது App Storeஇல் இருந்து நீக்கியுள்ளது.

அகற்றப்பட்ட செயலிகளில் மிகவும் முக்கியமானது ICEBlock என்ற பிரபலமான அமெரிக்க செயலியாகும்.

டொனால்ட் டிரம்ப் நிர்வாகத்தின் உயர் அதிகாரிகளின் வற்புறுத்தலின் பேரில் இந்த நடவடிக்கை எடுக்கப்பட்டது. இதில் அமெரிக்க அட்டர்னி ஜெனரல் பாம் போண்டியும் அடங்குவர்.

இந்த செயலிகள் மூலம், பயனர்கள் அதிகாரிகளின் இருப்பிடங்களை அநாமதேயமாகக் குறிக்கவும், மற்றவர்களுக்கு விரைவாகத் தெரிவிக்கவும் முடிந்தது.

டல்லாஸில் உள்ள ICE மையத்தில் சமீபத்தில் நடந்த துப்பாக்கிச் சூட்டில் இரண்டு குடியேறிகள் கொல்லப்பட்ட சம்பவத்தையும் அமெரிக்க FBI தொடர்புபடுத்தியுள்ளது.

சம்பவத்திற்கு முன்பு துப்பாக்கிச் சூடு நடத்தியவர் இந்த செயலி மூலம் குடிவரவு மற்றும் சுங்க அமலாக்க அதிகாரிகளின் இருப்பிடத்தைச் சரிபார்த்ததாக அவர்கள் கூறுகிறார்கள்.

அதன்படி, இந்த செயலிகள் சட்ட அமலாக்க அதிகாரிகளின் பாதுகாப்பிற்கு அச்சுறுத்தலாக இருப்பதாக டிரம்ப் நிர்வாக அதிகாரிகள் தெரிவித்துள்ளனர்.

அகற்றப்பட்டதை உறுதிப்படுத்தி, Apple நிறுவனம் சட்ட அமலாக்க நிறுவனங்களிடமிருந்து பாதுகாப்பு அபாயங்கள் குறித்த தகவல்களைப் பெற்றதாக கூறியது.